جديد ڊڪشنري - هالار اترادي

جديد ڊڪشنري

هالار اترادي

۱: وڪيل: حرام حلال جي ڪاتي.

۲: صوبيدار: مرڻو به کائي، پرڻو به کائي.

۳: ملان: آڻ پرائي، ته ڏسئون کائي.

۴: حاجي: انٽرنيشنل واپاري.

۵: واپاري: يا! ملاوٽ تيرا آسرا.

۶: انگريزي اسڪول: ٽيوشن سينٽر.

۷: ٻهراڙيءَ جو پرائمري ماستر: وڏيري جو منشي.

۸: انگريزي ماستر: ڪاپي ۽ ٽيوشن جو چيمپيئن.

۹: ڪاليج: کڙتالي سياست گهر.

۱۰: ليڪچرار: جيڪو پهرين تاريخ تي ڊيوٽي تي اچي.

۱۱: پرنسپال: ڪاپي سينٽر جو رکوالو.

۱۲: پوليس وارو: سرڪاري ڌاڙيل.

۱۳: انفرميشن آفيسر: سرڪاري چغل خور.

۱۴: چيئرمين عشر زڪواة: ڪُرڙين جو واهي ڪنگ.

۱۵: هيڊ ماستر: ٽيوشن سينٽر جو رکوالو.

۱۶: انشورنس آفيسر: حضرت عزرائيل جو نمائندو.

۱۷: ٽي وي: ڪلاشنڪوف ڪلچر جو تربيت گاه.

۱۸: سياسي ليڊر: يا ڪرسي تيرا آسرا.

۱۹: سرڪاري بس: گشتي نيم حڪيمن جو دوڪان.

۲۰: اسيمبلي هائوس: چونڊيل نمائندن جو آکاڙو.

۲۱: ٻهراڙيءَ جو اسڪول: چڱي مڙس جي اوطاق.

۲۲: سرڪاري ڊاڪٽر: ڊيوٽيءَ تي مريض، پرائيويٽ ڪلينڪ تي ڊاڪٽر.

۲۳: ايمبولنس: ڊاڪٽرن جو سرڪاري ڪنوينس.

۲۴: فقير: ڪم چور.

۲۵: پرائمري اسڪول: مڇي مارڪيٽ.

۲۶: سرڪاري اسپتال: دارالبقا جو ٽڪيٽ گهر.

۲۷: وي سي آر: نئين نسل لاءِ مٺو زهر.

۲۸: ويڊيو گيم: ٻارن لاءِ ٻرو.

۲۹: پرائمري ماستر: پڙهو نه پڙهو، پھرينءَ تي اسان جو پگهار کڙو.

۳۰: وڏيرو: چورن جي ناني.

۳۱: اخبار: ڌاڙيلن جو خبرنامو.

۳۲: هاري: پاڻ بکيو، ٻين کي کارائي.

۳۳: هيروئني: خانداني منصوبه بندي وارن جو خيرخواه.

۳۴: شاگرد: سياسي پارٽي جا داداگير.

۳۵: ڌاڙيل: وڏيرن جو ماڻهن-مار توبچي.

۳۶: دادو-ڪوٽڙي لائين جي ريل: ريلوي پوليس جي موبائيل ملڪيت.

۳۷: ٿاڻو: مسڪينن لاءِ گهاڻو.

۳۸: واپڊا کاتو: اونده وڪڻي، پئسا ڪمائي.

۳۹: امتحاني بورڊ: اهليت جا سرٽيفڪيٽ وڪڻندڙ کاتو.

۴۰: ٽيليفون کاتو: ڳالهايو نه ڳالهايو، پئسه ڏيو.

۴۱: وزير: جيڪو ووٽ غريبن کان وٺي، نوٽ اميرن کي وَٽائي.

۴۲: مشير: نه سڄڻ کي آسرو، نه دشمن کي ڀؤ.

۴۳: وڏو شاعر: جيڪو صدارت جي ڪرسيءَ کي ڳوليندو هجي.

۴۴: محقق: جيڪو گهڻن ڪتابن تان ڪاپي ڪري.

۴۵:صحافي: ڳالهائي ته شير، لکي ته لومڙي.

۴۶: نقاد: ناڪام اديب.

۴۷: تعليم: فضول خرچي.

۴۸: بورچي خانو: عورتن جي ليبارٽري.

۴۹: حقو: هڪ ئي ڪش ۾ ۱۰ سگريٽ.

۵۰: سياست: ٺڳي.

۵۱: محبت: ڪوڙ ۽ دوکو.

۵۲: سياستدان: جيڪو چوي ۲ ۽ ۲ ٿيا پنج

(ڏيھاڙي برسات ڪراچي، ڇنڇر ۱۷ سيپٽمبر، ۱۹۹۴ع تان ٿورن سان کنيل)